တစ်သက်သာစာပေဆုရှင်၊ အလင်္ကာကျော်စွာဘွဲ့ရ၊ စာရေးဆရာကြီး မောင်ပေါ်ထွန်း ကွယ်လွန်

တစ်သက်သာစာပေဆုရှင်၊ အလင်္ကာကျော်စွာဘွဲ့ရ၊ စာရေးဆရာကြီး ဆရာမောင်ပေါ်ထွန်း (ခ) ဦးခင်မောင်စိုး ကွယ်လွန်ကြောင်း သိရသည်။

ရန်ကုန်မြို့၊ မြို့မကျောင်းလမ်းရှိ တပ်မတော်ဆေးရုံ၌ ဆေးကုသမှုခံနေစဉ် သြဂုတ် ၁၃ ရက် နံနက် ၉ နာရီ ၄၅ မိနစ်တွင် ၉၆ ပါး ရောဂါဖြင့် ကွယ်လွန်ခြင်းဖြစ်ပြီး ကွယ်လွန်ချိန်တွင် အသက် ၈၈ နှစ်ရှိပြီဖြစ်ကြောင်း သိရသည်။

“ဆုံးတာက ၉၆ ပါး ရောဂါနဲ့ပေါ့။  မြို့မကျောင်းလမ်းနားမှာရှိတဲ့ တပ်မတော်ဆေးရုံမှာ ဆုံးတာပါ”ဟု ဆရာကြီး၏ တပည့်ရင်းဖြစ်သူ ဆရာထွဋ်ခေါင်က ပြောကြားသည်။

တစ်သက်သာစာပေဆုရှင်၊ အလင်္ကာကျော်စွာဘွဲ့ရ၊ စာရေးဆရာကြီး မောင်ပေါ်ထွန်း၏ နာရေးကို ရန်ကုန်တိုင်းဒေသကြီး၊ တောင်ဥက္ကလာပမြို့နယ်၊ ၁၀ ရပ်ကွက်၊ ဇေယျာ ၈ လမ်း၊ အမှတ် ၃၄၉ တွင် ပြုလုပ်မည်ဖြစ်ကြောင်း သိရသည်။

ဆရာကြီး၏ စျာပနကို သြဂုတ် ၁၅ ရက် (တနင်္လာနေ့) မွန်းလွဲ ၃ နာရီတွင် ရေဝေးသုသာန်သို့ ပို့ဆောင်မီးသဂြိုဟ်မည်ဖြစ်ပြီး ကွယ်လွန်သူ ဆရာမောင်ပေါ်ထွန်းအား ရည်စူး၍ သြဂုတ် ၁၉ ရက် (သောကြာနေ့) နံနက် ၇ နာရီမှ ၁၁ နာရီအထိ ဘုရားအမှူးရှိသော သံဃာတော်အရှင်သူမြတ်များအား ဒါတဗ္ဗဝတ္ထုအစုစုတို့ဖြင့် ဆက်ကပ်လှူဒါန်းကာ ရေစက်ချအမျှပေးဝေမည်ဖြစ်ကြောင်း သိရသည်။

ဆရာမောင်ပေါ်ထွန်းကို ၁၉၃၅ ခုနှစ် မေလ ၁၄ ရက်တွင် ရခိုင်ပြည်နယ်၊ မာန်အောင်မြို့နယ်၌ မွေးဖွားခဲ့ပြီး ကွယ်လွန်ချိန်တွင် အသက် ၈၈ နှစ်ရှိပြီဖြစ်သည်။

ဆရာမောင်ပေါ်ထွန်းသည် ဘာသာပြန်စာပေဖြင့် တိုင်းပြည်နှင့် လူမျိုးကို အကျိုးပြုခဲ့သော စာပေများစွာ ရေးသားခဲ့သူဖြစ်သည်။ ဆရာမောင်ပေါ်ထွန်း ရေးခဲ့သော ထင်ရှားသည့် စာအုပ်များမှာ သန်းခေါင်ယံ လွတ်လပ်ရေး၊  ကျွန်မချစ်တဲ့ ဆူကာနို၊ နိုင်းမြစ်ဝှမ်းမှ တော်လှန်ရေး၊ ပင်တဂွန်၊ ယက်ဖ်တူရှင်အပါအဝင် ထင်ရှားသည့် ဘာသာပြန်စာအုပ်ပေါင်းများစွာ ရေးသားခဲ့သည်။